局長2013滿腹大計

【明報專訊】過埋今晚2012年就成為歷史，呢一年發生好多大事，又係選舉年，政府換屆，梁振英（CY）班子上場後社會政治爭拗不斷，展望2013，Emily問梁班子有乜嘢願望同大計，佢哋除咗希望社會和諧同埋市民身體健康，唔少局長都滿腹大計，有局長話想同市民討論垃圾徵費，有局長就想搞產業發展政策等。


未提發免費電視牌照

商務及經濟發展局長蘇錦樑話好多嘢想做，最期望梁振英提出嘅「經濟發展委員會」早日成立，扶助經濟產業，又希望可以促進本港知識產權貿易發展，令香港成為知識產權貿易樞紐。Emily就最想知道免費電視牌照幾時先可以發出，但蘇局長就未有提到。


運房局長張炳良管理房屋同交通兩大市民關心嘅範疇，佢提到南丫島海難令人傷心，明年要重點管好海上交通安全法規。至於房屋，想制訂好長遠房屋策略，因為房屋問題好急切。長遠房策係重要，但Emily眼看樓價高企，呢個「近火」希望張局長都要密切留意呀。


食衛局長高永文好難忘DR醫學美容集團事故搞出人命，所以政府成立嘅督導小組今年都要釐清美容服務同醫療程序嘅分野，睇嚟都係辣工作！高醫生又話想公私營系統平衡發展，會致力推動「醫療保障計劃」，等市民除咗睇公院，仲可以喺服務上有更多選擇。


曾答不出 黃錦星難忘處理電費加價

建築師出身嘅環境局長黃錦星，話今年最難忘嘅工作係處理電費加價，因為要平衡環保減排，又要關顧基層。其實黃局長上任初期已因電費問題「中伏」，上電台時被主持人問佢電力公司准許利潤回報係幾多時，口啞啞答唔到，唔怪得佢咁難忘！不過，黃局長確係有心人，佢希望2013年與可持續發展委員會就開展廢物徵費與市民商討。黃局長向市民攞錢，茲事體大，祝局長好運！


Emily上個禮拜搵過CY問大計，可能因為佢好忙同休假，到噚日截稿時仲未回覆，2012年仲有今日，希望佢今日覆到啦！而財經事務及庫務局長陳家強，Emily未聯絡到佢嘅新聞秘書，所以唔知佢嘅願望。仲有保安局長黎棟國放咗假，所以回覆唔到Emily。


迎接2013，Emily借用政務司長林鄭月娥嘅祝福說話﹕祝大家身體健康、萬事如意！