年度漢字評選推「誠」、「實」文化

【明報專訊】政黨搞活動無奇不有，好似立法會第一大黨民建聯，就搞一個「年度漢字」選舉，話要弘揚中國文化，揀咗10漢字畀市民投票，仲話活動可以反映社會對2013年嘅期盼咁講。不過，唔知民建聯係咪想趁新年向特首梁振英「贈興」，佢哋篩選嘅漢字當中，包括「誠」同「實」呢兩個字，想提醒人做人有誠信，要忠實不欺，又話呢啲係社會重視價值，所以千祈唔好呃人。


民建聯話，今次搵埋學者、專家、專欄作家、出版界代表及民建聯成員組成「年度漢字」評審委員會，先選出10個候選漢字；委員包括立法會主席曾鈺成、議員蔣麗芸、學者何文匯等。甄選漢字準則包括：字義清晰，既能代表對過去一年嘅回顧和總結，更要具有對2013年嘅期盼，以及有積極向上正面意義。除咗「誠」同「實」，仲有「禮」字，民建聯成日被反對者嘲諷為「禮義廉」，今次揀番個「禮」字，證明佢哋都幾有幽默感。


民建聯想吸引人投票，所以參加者可以抽獎，頭獎禮物係智能手機，10名安慰獎都有800元超市禮券，支持民建聯活動，果然有「錢」途。想攞獎品，可以上民建聯網站投票。