元旦遊行政團奇招籌款

【明報專訊】民陣噚日發起元旦倒梁大遊行，政黨沿途擺設街站籌募經費，為求吸引市民慷慨解囊，政黨各出奇謀，其中，民主黨同工黨不約而同放置一個特首梁振英嘅大紙牌，民主黨叫市民用橡筋「彈」紙牌，工黨就準備咗一個「騙」字蓋章，市民可以喺特首「紙牌臉」上蓋印。


學民思潮「財源滾滾」

公民黨由女將「出聲」籌款，前立法會議員陳淑莊（Tanya）全個下晝不停咁唱改編版嘅《壞女孩》，諷刺有部分挺梁者係收錢遊行。嗌到聲沙嘅Tanya獻技，市民拍手讚好，部分人更將一張張500蚊紙塞入籌款箱。


不過，要數「籌款之最」就非90後組成嘅學民思潮莫屬。Emily噚日經過佢哋街站，見到大批市民衝住咁去捐款畀佢哋，原來學民思潮並無發起籌款，只係擺咗意見箱出嚟，就已「財源滾滾」。


早前被揭違規籌款嘅學民思潮話，意見箱係用嚟收集意見，但承認有市民放咗優惠券、心意卡入箱，佢哋話，如果市民捐款，款項一定全數用喺倒梁行動，佢哋亦搵咗義務核數師幫手睇盤數，預計好快完成公司同社團註冊，6月會公布財政狀况。