陳太讚黃之鋒淡定

【明報專訊】前政務司長陳方安生噚日同記者茶敘，講到新一年嘅大計時，就話會繼續做學校巡迴演講，同年輕人講解「一國兩制」，以及人權、法治、自由等價值。陳太話，同年輕人對話，仲可以知道佢哋嘅諗法。


陳太話，近幾年年輕人就政治同社會議題愈嚟愈敢於發言，尤其喺人權、自由受到干預嘅時候。佢仲大讚發起反國教運動嘅學民思潮，希望佢哋係香港未來嘅政治領袖。陳太讚學民思潮召集人黃之鋒，覺得佢發言時有紋有路，非常淡定，但就無同佢接觸過。