泛民1400動議拉布

【明報專訊】立法會財委會傾咗成兩個月嘅長者生活津貼，終於喺上年12月初通過，政府未有再提新撥款，所以今年第一次嘅財委會，就討論由財委會主席提出，日後若議員要修訂財委會同轄下兩個委員會嘅議案，必須喺至少開會前5日提出，如果要就議案提修訂，要喺開會前兩日提出，即係俗稱「5+2」嘅討論。民主派就嚴陣以待，已經提出1244個修訂。


討論通過「5+2」議案

民主派嘅修訂，明顯係為拉布而做，好似陳偉業提出嘅480條修訂中，就將開會前5日呢個動議改成6日、7日、8日咁；至於修訂其他議員提嘅動議修正案，就由兩日前改成開會前1小時、兩小時咁，其他民主派議員提出的修訂亦類似。


之前民主派講過，為咗對抗建制派禁拉布，揚言要玩足4年，不過，今日財委會討論呢個有1244條修訂嘅動議，相信都好快會完結，因為民建聯葉國謙透露，原本大家諗住「5+2」係有共識先至提出，點知原來民主派唔贊成，所以今日將會提出中止待續。


葉國謙話預計今日大約會有35個建制派議員現身，如無意外嘅話都可以通過。