黑客想入侵克勤電郵

【明報專訊】政界人士嘅電郵入面有唔少機密資料，隨時都有可能成為黑客入侵嘅對象，有傳即將會接任民建聯副主席嘅立法會議員陳克勤，唔知係咪因為就嚟上位，所以近日就成為黑客希望入侵嘅目標，克勤仔噚日登入佢處理議員辦事處嘅gmail，就畀系統提醒，「系統已阻止可疑的登入 」，資料仲話有人嘗試喺美國登入，叫佢小心啲咁話。


上月底fb亦有可疑登入

克勤仔話，其實除咗佢議員辦事處嘅gmail，喺12月底嘅時候佢個facebook帳戶亦都出現過同一情况，都係話收到可疑登入，地點又一樣係美國。克勤仔對於近日接連被黑客嘗試入侵感到奇怪，話電郵主要處理辦事處工作，當中有佢嘅工作日程。