譚耀宗否認劃清界線

【明報專訊】啱啱過去嘅元旦挺梁大遊行，絕對係建制派嘅一件盛事，不過，Emily同行家喺現場就搵唔到民建聯嘅人。民建聯主席譚耀宗噚日喺商台節目《在晴朗的一天出發》就話，嗰日要陪家人，所以無去；至於黨員可以自由出席，否認係劃清界線。


黨員「去唔去自由決定」

當日就連曾經實牙實齒話會參加遊行嘅民建聯蔣麗芸同埋鍾樹根最後都無現身，究竟係咪民建聯落咗order要劃清界線呢？譚耀宗就強調，民建聯唔係遊行發起團體，又話以往回歸、國慶慶典，「香港各界慶典委員會」都無搵政黨一齊做，所以去唔去係黨員自由決定，絕對唔係刻意保持距離。


至於今次出現「流動廁所派錢」一幕，譚耀宗就主動提起，上年5月反拉布集會時，「有班友舉晒牌」拉民建聯落水，事後民建聯秘書長彭長緯辦公室收到電話，投訴集會完咗都未收到錢，民建聯已經報警，但事隔近8個月，仍然無聲氣。