夢熊：唔用我係CY損失

【明報專訊】全國政協劉夢熊曾被視為頭號「梁粉」，去年特首選舉期間更到唐宮外呼籲捲入僭建風波嘅唐英年棄選，不過，儘管梁振英（CY）上任後委任唔少「梁粉」入局，卻冇夢熊份。「Dream Bear」噚日終於發火，宣布自己唔會做「盲目嘅梁粉」，狠批CY向唔夠班嘅人大派公職，仲高呼：「佢唔用我係佢嘅損失！」


話CY「心理質素差」

劉夢熊噚日去泛民搞嘅「一國兩制對一國控制」研討會任嘉賓，全程恍如泛民上身，先批評被浸大免職、撰寫《香港藍皮書》嘅薛鳳旋係「左王」，聲言要「防止左傾、捍衛香港核心價值」，之後批評CY施政走向民粹、進退失據，仲話佢「心理素質差、戰鬥力弱……如果成日自我感覺良好，只會上辜負中央、下辜負港人」。


無悔做過梁粉

Dream Bear不諱言CY委任嘅行會成員「唔夠班」，仲接二連三邀請佢哋做公職，明顯係用人唯親。大家即時追問佢係咪講緊張志剛呢，夢熊唔肯承認，但就大聲話對張志剛被傳入大學教育資助委員會「不願置評」。佢又話，對CY委任啲大炒家入行會感到莫名其妙，唔知係咪影射早前因涉偷步賣樓而暫時休假嘅林奮強。


雖然係咁，高呼CY唔用佢係損失嘅夢熊，依然留有一線，話即使CY隱瞞僭建，都唔會後悔支持佢。如此長情癡心，唔知下次CY委任公職會唔會有佢份呢？