《法網狙擊》搞錯法律捱嘲

【明報專訊】喺免費電視牌遲遲未發出下，唔少港人只能一邊鬧、一邊繼續睇TVB嘅劇集。家播緊嘅《法網狙擊》，日前又被網民踢爆製作「事事旦旦」，但今次唔係喺古裝劇內發現「史迪仔手袋」咁簡單，而係佢哋將《普通法》，誤講成好似香港法例一樣、一章一條嘅「成文法」。


法律學者也驚訝

所謂「普通法」，其實係依據法官透過判案時嘅決定，發展而成嘅一套法律慣例，法庭會參考以往相近嘅案例判案，絕對唔係一條條成文法。所以當《法網狙擊》嘅律師一開口話：「根據普通法第210章第11條《盜竊罪條例》……」，唔少讀過法律嘅觀眾都當堂打個突，估唔到TVB會將《香港法例》第210章改成《普通法》第210章。


有網民話，對住TVB「認真便輸了」。Emily噚日好認真咁問過港大法律系副教授戴耀廷意見，佢笑言冇追開呢套劇，但都對TVB犯上呢個錯誤感到驚訝，仲話啲編劇製作呢類法律劇集時，好少請教法律學者嘅意見。