財爺設計超人唔畀似自已

【明報專訊】財爺曾俊華話香港除咗經濟傳統四大支柱（金融丶貿易物流、旅遊丶專業服務），創意工業都有睇頭，佢親身支持創意設計，跟同事夾手夾腳二次創作咗一個「飛天超人」公仔，公仔著住一件「香港T恤」，披一塊粉藍色嘅白雲斗篷，寓意香港高飛，希望從事創意產業嘅朋友繼續「天天向上」，成為新產業支柱。


撐創意業 白雲斗篷寓高飛

財爺噚日2013年第一篇網誌，藉住回顧2012香港設計年活動，推介香港嘅創意產業都可以有作為。佢話「天天向上」係好朋友榮念曾1970年代開始創作嘅概念漫畫，而榮念曾舊年搞咗個以「天天向上」做主題嘅活動，用咗概念漫畫主角「天天」做主角，安排學生發揮創意，設計出一個個與別不同嘅「天天」。


財爺話好喜歡美術，後生嗰陣成日「畫公仔」。但當榮念曾將個近兩呎高嘅「天天」交畀佢時，佢都不知所措，因為佢無時間一手一腳製作，所以搵同事幫手。佢話最初有人提出為「天天」加一撇鬍鬚，攞住把西洋劍，但佢認為唔應該搞個人化。幾經討論，佢哋設計咗「飛天超人」造型：著一件簡單嘅「香港T恤」，披一塊白雲斗篷。「天天超人」嘅T恤仲係同事以一條條棉線編織而成，代表公務員樸素同有條理嘅形象。而「天天」嘅手繩，係用政府同事嘅「文房四寶」之一——「盲公繩」織成，政府同事睇到一定認得出喎。