發叔病完又病 繼續缺席立會

【明報專訊】「發叔」劉皇發已經黐住病榻3個禮拜，噚日開嘅發展事務委員會，身為主席嘅佢仍然要告病假，由副主席謝偉銓主持會議。76歲嘅發叔近3星期患感冒，聖誕前後已經進進出出醫院幾次，雖然佢前幾日已經返屋企休養，但據知因為食咗抗生素有副作用，感到手軟腳軟，既然長命工夫長命做，所以都係唔好咁操勞，決定唔出席立法會會議。雖然如此，發叔噚日都有喺辦公室短暫現身，精神還可。


上月好番啲 轉頭又中招

其實發叔病情都有好轉過，喺上月19日港區人代選舉，發叔向醫院請假出嚟投票，當時佢戴住口罩，精神還好，但唔知係咪太多人慰問佢，懷疑發叔又畀人感染流感，所以病情又轉差，要繼續食藥留院。所以，病灶未清，發叔都係小心為上，等好番至去人多嘅地方。