樓王Ann搬屋無心水

【明報專訊】民建聯立法會議員蔣麗芸（Ann）都算係立會議員中嘅樓王之一，家住康樂園嘅佢或者想親近選民，最近有意搬出九龍西住，但樓市不斷上升，搞到連Ann姐都嫌貴，加上若果同康樂園比較，九西嘅樓亦唔夠大，所以到家都仲未睇得啱。


雙辣招 唔捨得交稅

Ann姐透露，做咗議員後都無買賣過物業，坦言做議員都要小心啲、避吓嫌，而且政府推出雙辣招，包括買家印花稅，都對Ann姐影響好大。Ann姐話，買賣物業係投資，始終用公司名義買樓會比較方便，但家要畀多15%稅真係好甘，買樓都唔係咁易。


睇咗美孚奧運九龍站

佢話呢排喺美孚、奧運、九龍站等地方睇樓，但似乎都唔係好合心水，除咗單位唔係好夠大，更重要係樓價太貴，好似美孚新邨咁耐樓齡嘅屋苑，都要超過1萬蚊呎，令佢要卻步諗吓先。


如果連Ann姐做開物業投資嘅人都嫌樓價太高，睇怕特首梁振英都要諗多啲新招，幫一眾夾心階層易啲上車至得喇。