陳維安教仔賭波？

【明報專訊】立法會秘書長陳維安（Kenneth）喺2008年做教育局副局長前，做過馬會馬場事務部總監，所以對馬會都好熟悉，雖然佢兩個仔都未夠18歲，但原來Kenneth都有教佢哋點賭波。Kenneth當然唔係教佢哋有乜嘢必勝心得，但就講吓數口，佢仲替前僱主「倒米」，同阿仔講馬會做「莊家」接受投注，食水都幾深，好似買波咁，例如顧客落注100蚊，無論買咩都好，馬會已經抽12蚊水先再計賠率。


Kenneth話佢唔係球迷，但細仔就係曼聯超級fans，連牀單都係曼聯嘅，所以佢作為爸爸有時都要同個仔講吓波經嘅。佢仲話早排大仔送咗個曼聯月曆畀細佬，細仔開心到立即將日曆撕晒落嚟，好似變成12月曼聯牆紙咁貼出嚟，十分搞笑。


家馬會接受嘅賭波都好多元化，聯賽方面除咗港人熟悉嘅英格蘭、德國、荷蘭等地外，連澳洲、美國、挪威等地足球都可以落注，而且項目多元化，不過Kenneth就話，喺投注額上，賭波投注額都唔夠賽馬多，佢透露係因為計算投注額時，賽馬計埋過關投注額，投注額亦會因此不斷乘大，表面上大過足球投注額。