立會馬拉松 開足廿粒鐘

【明報專訊】自從立法會議員增至70人後，通常立法會大會都冇可能喺星期三一日開得晒，要延續到第二日嘅下晝3點前先完成；不過，今個星期嘅大會，喺冇拉布下，竟然出乎意料開到噚日傍晚6點幾，兩日內足足開咗20個鐘，成為今個會期至今最長嘅會議，唔少議員同記者都感意外。


捍衛法治動議少人發言

查實睇番議員發言次數，可以睇到佢哋關注乜嘢。噚日辯論全面檢討強積金計劃議案，幾乎成個立法會，唔計左中右嘅議員都踴躍發言，但由公民黨郭榮鏗提出嘅捍衛法治同司法獨立議案，發言者就明顯較少，莫非喺佢哋心中，為MPF止血較法治重要？


噚日辯論捍衛法治議案時有件趣事，多名有法律背景嘅議員，好似謝偉俊、梁美芬同公民黨梁家傑等，都企圖「守尾門」，喺主席曾鈺成問仲有冇議員想發言時先舉手，似乎想藉最後機會駁斥對手，唔畀對方有反駁餘地。