蔣麗芸累咗男同僚

【明報專訊】民建聯蔣麗芸（Ann）前日喺立法會一婦當關，發言力抗泛民彈劾特首梁振英（CY），即時人氣爆燈。Ann姐噚日話，好幾個男議員都怪責佢，不過唔係抱怨佢挺CY，而係因為佢哋返到屋企，畀老婆問記唔記得幾時係結婚紀念日。


自嘲「應話我單戀吳克儉」

Ann姐前日喺立法會高聲咁話，好多男人「連自己結婚紀念日都記唔清楚，何况係花棚？」，如此瞓身撐CY，網民即刻惡搞佢戀上CY，但係Ann姐不但無嬲，仲識得玩自嘲，「如果你話我鍾意梁振英，你應該話我先單戀吳克儉」。泛民之前對教育局長吳克儉提不信任動議，Ann姐當時都好激動咁撐局長。


其實，男人唔記得結婚紀念日，Ann姐對此有切身體驗，佢話老公梁海明無記性到連幾時生日都唔記得，情人節就更加唔好提。但佢都有幫老公講好話，話老公事後識番佢，話日日都係紀念日、情人節！Ann姐話，對上一次結婚紀念日係有慶祝；至於佢自己，一定記得老公幾時生日，因為佢搵咗秘書早早幫手，將呢個重要日子輸入佢嘅記事簿提醒佢！


六四後訪問梁振英

噚日有網民搵咗一段陳年舊片放上網，話Ann姐同CY好多年前已結緣，呢段片係年輕貌美嘅Ann姐訪問後生嘅梁振英。Ann姐噚日睇番段片笑口騎騎，同Emily話呢段片係1989年六四事件後，香港電台製作嘅《亞洲經驗》節目。當時經濟不穩，佢以主持人身分，搵唔同人講點樣振興經濟，所以佢訪問咗測量界嘅梁振英。呢段片可以上網睇到http://www.youtube.com