張堅庭窒CY

【明報專訊】特首梁振英（CY）上任7個月，唔單止民望下滑，連昔日嘅支持者亦紛紛批評。曾經表明係CY支持者嘅導演張堅庭都話對CY失望，覺得CY嘅「語言天分」用錯咗喺死撐僭建無錯之上。佢仲留意到，CY同成個團隊好似患咗「被迫害妄想症」，覺得批評者都想害佢哋，「呢個諗法，呢5年慢慢滲落去，香港真係好大鑊」。


不滿「紅人」入中策組

張導演話唔識CY，只係作為一般市民表達失望，佢話，失望係緣於CY不顧民意，委任泛紅嘅邵善波做中策組，行政會議又安插「紅人」，而CY死撐僭建無錯亦係原因。


指CY太聰明反顯狡猾

作為說話技巧導師，張堅庭曾讚過CY係天生演說家，但佢覺得，領袖其實更需要寬容同智慧，CY句句算到盡，太「聰明」反而令佢變得狡猾。佢話CY更有「被迫害妄想症」，覺得批評都係針對同迫害佢，檢視問題時就唔得全面，呢個心態一定要改，連佢嘅團隊都係咁，好似夫婦嗌交，「贏咗場交，輸咗個家」。


指須推普選化解危機

去到呢個地步，張導演都話好難搞，佢覺得要化解，最重要係努力推動2017年普選，起碼到時嗰個人喺大家揀出嚟，忍多幾年，都係為咗自己揀咁話！