新民黨兩歲

【明報專訊】新民黨聽日將會喺龍堡國際酒店舉行兩周年晚宴，雖然新民黨得兩個立法會議員，但特首梁振英、政務司長林鄭月娥、財政司長曾俊華同律政司長袁國強都會畀面出席。據聞新民黨副主席田北辰仲會喺晚宴高歌，慶祝個黨兩歲生日咁話。


特首三司畀面赴宴

田二少真係好有興致唱歌，上年喺新民黨一歲嘅晚宴，曾經同政界歌神、時任食物及衛生局長周一嶽大唱《沉默是金》。不過隨局長離任，相信「嶽曲」未必再現。


至於當年任發展局長嘅林鄭月娥，家榮升政務司長，林太當年耍手擰頭唔肯上台唱，唔知今年又有冇興趣挑戰歌神位置？如果加埋舊年上台獻花嘅新民黨主席葉劉淑儀，一齊合唱Twins，相信唔難打破周一嶽嘅歌神招牌。