辰曲搶鏡 嶽曲再現

【明報專訊】新民黨噚晚喺尖沙嘴舉行兩周年晚宴，雖然特首、3司12局都有派人到場，但論搶鏡就點都唔夠副主席田北辰，皆因晚宴就好似變咗二少嘅個人演唱會咁囉，就連久未出山嘅政壇歌神、食物及衛生局前局長周一嶽，都同二少合唱，但唔係唱《忘不了你》，而係英文歌Devoted to You，認真畀面。


查實兩人合唱已經唔係第一次，1周年晚宴時佢哋合唱《沉默是金》，當大家以為「嶽曲」不再，周一嶽噚晚就成為唯一畀面到場嘅前朝局長。周一嶽話，退任「行吓山、唱吓歌、打吓波」時間好快過，又話現任局長高永文表現唔錯，但形容高局長嗰個係「高危」位，請傳媒唔好寫到高局長咁負面喎！


同議員合唱《認錯》

原來「嶽曲」只係頭盤，二少後來仲同保安局副局長李家超、入境處長陳國基唱《海闊天空》，又同平時上鏡都唔肯嘅商界立法會議員廖長江唱優客李林嘅《認錯》，唔知係咪唱畀台下嘅特首梁振英聽呢？至於黨主席葉劉淑儀就比較低調，只係頻頻敬酒招呼賓客。


港發展停滯 田歸因跪低文化

另外，田北辰噚日喺港台發表「香港家書」，話香港近年發展停滯不前，同立法會內一種「跪低文化」有關，質疑有議員「不問對錯、逢政府必反」，又批評議會有「講價文化」，二少咁識出位，唔怪得佢成為見報曝光王。