梁栢賢送林鄭走

【明報專訊】伊利沙伯醫院噚日舉行「健步行」同樂日，請咗政務司長林鄭月娥做主禮嘉賓，林太全程笑容滿臉，穿上大會指定嘅紅色T恤，兼且坐咗大半個鐘頒獎畀參與健步行活動嘅得獎者；不過獎項眾多，日理萬機嘅林太中途要急急腳咁走，連記者行家提問都答唔到，台下嘅醫管局主席胡定旭同行政總裁梁栢賢，以及一眾高層亦好殷勤，成班人即時護送林太上車離開，但台上頒獎環節仲未完，司儀請咗梁栢賢上台幾次都冇人應，搞到台上「真空」咗一陣子，場面都幾尷尬，梁醫生送完客就急急上番台繼續頒獎。


呢個健步行係慶祝伊院金禧院慶嘅頭炮活動，之後仲有一連串慶祝活動㗎。