大律師公會主席換屆

【明報專訊】大律師公會即將換屆，主席林孟達噚日喺法律年開幕儀式上話兩日後佢就退休讓賢，Emily就八到新主席人選好大機會就係家負責緊海難聆訊、代表調查委員會嘅資深大律師石永泰（Paul）。石永泰本身係今屆大律師公會副主席，亦係公會多年來嘅中堅分子，所以如果由佢頂上都係實至名歸。


終院2015中遷舊立會

另外，立法會搬去「門常開」已經一段日子，至於中環昃臣道舊立法會嘅新主人、即終審法院，終於落實喺2015年年中由炮台里搬過去。雖然新舊址只相隔兩條馬路，不過首席法官馬道立話，搬遷計劃涉及大樓結構測試同修復，而且要設計實用同更寬敞嘅法庭，所以仲要花好多時間。


外形似足動畫中「黎根」嘅馬道立，喺噚日法律年演辭提到，增加司法程序嘅透明度，係維持司法獨立嘅重要元素，佢仲話希望日後終審法院新址可以畀市民大眾到訪。Emily不時聽到同事行家投訴，喺終院聽案要打醒十二分精神，因為法庭設計唔掂，地方窄之餘，仲要好難先聽到法官同大律師講嘢，搞到同事做嘢都好唔方便。