5區「公投」密會照 3年後曝光

【明報專訊】公民黨同埋社民連喺2009年籌劃立法會5區總辭後補選，就政改方案搞變相「公投」，一張記錄咗兩黨「謀反」嘅「革命」相片曝光！

當年有份籌劃「公投」嘅公民黨曾國豐，近日將相片放上facebook，話張相攝於09年冬天，兩黨經過多輪談判，雙方同意一齊搞「公投」，所以應長毛梁國雄提議，影低歷史一刻。不過因為當年事件敏感，所以大家講好咗暫時唔公開相片，但家事過境遷就無乜所謂啦。


地點同見證反國教科家長組

公社兩黨談判聚會喺油麻地TC2餐廳舉行，餐廳係Emily前行家開嘅，但面臨續約加租，家都好煩惱。曾國豐之前同老闆吳婉君傾開，講到餐廳見證兩件社運大事，一件係反國教科家長組聚會，另一件就係「5區公投」誕生。


當年散會前後腳走

曾國豐話當年公社兩黨傾咗好多次，終於喺09年一個冬夜達成協議，當年每日都有好多記者追問，為免泄漏風聲，所以當時大家講好影完相後暫時唔公開相片。佢哋當時喺餐廳閣樓密談，碰巧有記者行家收工後喺樓下打躉聚會，所以為免太張揚，各人散會後都學藝人明星咁「前後腳」走，諗起都覺得搞笑。


由於餐廳環境昏暗，會面議題又敏感，唔怪得有朋友喺曾國豐fb留言，話張相好有同盟會feel！