新聞類別
港聞
詳情#
【明報專訊】十八鄉鄉事委員會主席梁福元之前被踢爆所經營嘅「荔枝山莊」霸佔官地，漁護署最近推出《香港休閒農場指南2013》，佢就反擊，質疑《指南》內有唔少農莊嘅瓜棚、農舍等設施唔知係咪違法，仲叫鄉局旗下嘅漁農工商旅遊委員會主任委員文春暉向政府反映，不過文春暉唔多熱中，仲叫梁福元自己搞個委員會討論喎！
介紹120農莊 梁質疑內容
《指南》介紹咗本地120個農莊，唔少有樹屋同農舍，仲有介紹梁福元個荔枝山莊。梁福元噚日就批評，文春暉領導嘅漁農工商旅遊委員會冇積極向政府反映意見，令本地休閒農業發展停滯不前。
文春暉「多謝梁福元訓示」，但批評佢咁講對委員好唔公平，又話佢同委員只係為鄉局「做事」，絕對唔係為榮耀，要求梁「收回言論」。佢話委員會唔係「文春暉委員會」，梁福元咁關注，不如自己搞個委員會討論呢件事喎！
主持會議嘅副主席張學明就叫大家日後慢慢傾，今日唔好討論呢個問題。另外，鄉局大樓超支，噚日鄉局建議村代表每人捐2000元薪金出嚟，希望籌到280萬元，幫吓手填數。
留言 (0)
