中出贊助賀歲煙花

【明報專訊】香港中華出入口商會（簡稱中出）今年1月1日選出新一屆會董同會長，28日會喺會展舉行會董就職禮。而今年中出仲會同海南商會合辦賀歲煙花匯演，據聞煙花會有激光效果，破天荒打落尖沙嘴文化中心，不過連任嘅中出會長莊成鑫就賣關子，話會再開記者會交代詳情喎。


月底搞換屆就職禮

商會換屆當然有新面孔，好似舊年其中一個副會長張明敏做咗全國人代後，就變咗永遠名譽會董；上屆秘書長陳勁就會兼任副會長。至於立法會前進出口界議員許長青嘅囝囝許華傑，就仍然任副會長。莊成鑫話就職典禮邀請咗特首梁振英（CY），相信佢會到，至於中聯辦主任張曉明就有事嚟唔到，由副主任殷曉靜代為出席。


CY吹風話要諮詢標準工時，該會榮譽會長黃定光同會長莊成鑫，就話唔介意傾吓訂立標準工時指引，但反對立法，認為唔同行業有唔同規矩，好難公平，又話好多中小企都要交貴租，未必應付到。