鄉局醞釀譴責何君堯早離場

【明報專訊】鄉局噚日討論「譴責有鄉議局委員向傳媒聲稱鄉議局誘騙申報僭建」臨時動議，矛頭直指屯門鄉委會主席何君堯（Junius）。事緣Junius之前批評鄉局，唔應該發信鼓勵村民申報僭建物，話局方誘騙村民，有委員認為Junius唔尊重局方決定。


發叔復出 仲有幾聲咳

沙田鄉委莫錦貴批評Junius，話一早有政府文件講明，村民申報後，若證明安全即可續期，話Junius唔知係「無睇過文件定有心」，先至批評鄉局；但亦有委員唔贊同譴責Junius，前立法局主席黃宏發就話委員只可譴責主席，唔應該譴責另一委員。


動議最終因為Junius提早離場下次先傾，Emily曾聯絡Junius，但電話無人聽。會後副主席張學明就話申報計劃之前已延長3個月，唔可能再無限期延長，假如有人未申報，只要能夠向鄉局提出合理原因，局方都會幫佢哋向屋宇署解釋。另外，鄉議局主席劉皇發（圖）噚日復出主持鄉議局會議，見發叔精神唔錯，仲同委員、顧問同傳媒朋友拜咗個早年，不過仲有幾聲咳，發叔要保重保重。


（李紹昌攝）