醫局5高層年2000萬

【明報專訊】特首梁振英噚日公布施政報告，Emily忙到氹氹轉，點知醫管局又喺噚日公布2011/12年度年報，Emily極速翻到公眾最關心嘅項目——醫管局5名高級行政人員嘅年薪。5人之中，最高薪係行政總裁梁栢賢（PY），年薪455.2萬，較對上一年度行政總裁薪金開支（期內包括前總裁蘇利民及接任的梁栢賢）嘅441.8萬多咗13.4萬。排第二位係揸數嘅財務總監謝秀玲，年薪425.2萬，比對上年度加咗38.1萬。


排第三係新界東聯網總監馮康，年薪419.6萬，加咗34.7萬人工。第四係醫管局聯網總監張偉麟，年薪413.4萬，加咗36.8萬蚊。第五係東區醫院臨牀腫瘤科部門主管李詠梅醫生，年薪371.9萬，5人年薪加起來合共2085.3萬。


醫管局同Emily講，考慮到李詠梅醫生臨近退休，管理層特別批准用一筆過現金45萬，支付李醫生未放嘅年假。