港大舊生踩場討公道

【明報專訊】港大學生會噚晚搞百周年慶典，唔少前港大學生會會長或幹事，好似運輸及房屋局長張炳良、自由黨主席周梁淑怡等都畀面出席。但現屆幹事會最近就捲入勞資糾紛，事關幫學生會打工32年嘅職員陳子君，舊年9月突然被幹事會以「偷竊」為由炒魷，直到家仲拖欠近兩萬蚊人工，近百舊生與子君噚晚踩場，要求現屆幹事交代。


被指偷竊解僱遭欠薪兩萬

一直幫陳子君解決欠薪嘅港大學生會08年會長郭永健話，子君為人低調，所以都係由舊生出頭發言。雖然佢哋趁現屆會長陳冠康致辭時，喺背後做人肉布景板示威兼嗌口號，但陳冠康一於少理，除咗表示幹事會已經出咗新聞稿，仲全程同示威師兄姐零交流。


幹事會聲明澄清解僱子君前有調查清楚、亦獲得評議會通過，又話欠薪只係計算方法不一。郭永健反擊話，事實係學生會拖欠舊年起按通脹為子君加薪嘅款項，講明「爭1蚊都係爭」，加上幹事會仲未解釋因乜理由要調查同炒子君，對幹事會嘅解畫唔收貨，舊生家研究循民事追討，誓要幫子君討公道。