張炳良重申撐普選

【明報專訊】運輸及房屋局長張炳良加入政府前係民主黨副主席，一直爭取普選，但加入梁政府就曾被人質疑，佢噚日喺港台節目《星期五主場》，唔似好多入咗官場嘅人咁迴避政治議題，仍然強調會喺政府推動2017同2020年普選。


指市民不信 梁難管治

張良話，梁振英被人感覺太親近北京，加上僭建風波，令泛民質疑佢嘅認受性。佢重申自己都支持普選，又同意由於政府並非普選，市民對梁政府信任度不足，管治環境艱難，行政立法關係亦唔太暢順。佢建議雙方關係唔只制衡，仲要互相合作，同各黨派溝通，亦要做「全民政府」。


唔少人話「梁粉」充斥各大委員會，局長解畫話，只要起用嘅人稱職就得，仲話美國總統奧巴馬都會起用身邊人。不過，眾所周知，美國實行普選，然後總統委任部長，曾經教政治嘅張教授無理由唔知啩？