談施政報告 唐唐厚道

【明報專訊】CY發表施政報告之後，換來唔少批評，Emily噚日喺一家公關公司嘅開張儀式，見到喺舊年特首選舉飲恨嘅唐唐，大家當然會問佢點睇CY嘅施政報告。唐唐都算好厚道，佢話「任何政策同建議，只要對香港好都會支持，但最緊要係如何執行同落實」。到底佢對CY係讚定彈，就任君演繹喇。


支持對香港好政策

講到呢間新開張嘅公關公司，打骰人係任總喺金管局時期嘅公關大員陳民傑。人稱Thomas嘅阿陳，喺唐唐競選特首期間，捨棄之前嘅高薪厚職，瞓身幫手助選。結果如何，大家都知。之後蟄伏大半年，Thomas原來自立門戶開公關公司，昨天喺儀式上任總同唐唐就高調撐場。


唐唐又被人問到金融發展局係咪太子黨當道，佢就即刻話，朱總嘅仔朱雲來（中金公司總裁）係好適合嘅人選，因為佢好有經驗，又熟悉香港。當年唐唐做工商及科技局長同財爺時，就已認識朱雲來。