深圳市委書記 幫比亞迪「賣廣告」

【明報專訊】深圳市政府真係好撐佢哋嘅本土企業比亞迪（1211），之前當地公安局買咗500架比亞迪自家製E6電動車做警車，前兩日深圳市開兩會，市委書記王榮嘅公家座駕，竟然亦都係比亞迪E6，呢個「代言人」都算分量十足囉。


坐比亞迪E6 支持電動車

書記以前嘅座駕係奧迪，但為咗身體力行推廣電動車，先至唔坐奧迪坐比亞迪。據深圳市嘅政府人員講，比亞迪一年前送咗兩部E6畀市委同市政府，一架分配畀王榮做座駕，另一架就主要用嚟禮儀接待。不過暫時深圳官員之中就只有書記用緊比亞迪，市政府亦無意將所有公家車都換晒電動車，事關開支大之餘，驚跑長途會唔夠電喎。


其實王榮認真唔話得，上年5月深圳市發生比亞迪的士被撞着火致兩死嘅交通意外，當時大家都擔心電動車係咪唔夠安全，但王榮就一於少理繼續坐，真係撐比亞迪撐到出面。