CY：16個委員會唔算多

【明報專訊】特首梁振英（CY）喺《施政報告》宣布成立N個委員會，令人質疑佢都係對政策採拖字訣，研究得嚟又搞幾年咁，不過梁振英似乎仍然好欣賞成立十幾個委員會嘅做法，佢噚日上電台時，仲聲稱成立16個唔同範疇嘅委員會其實唔算好多。點解？CY話，政府有3司12局加埋成15個司局長，有16個委員會，平均都係每司局一個，唔算多喎。


律政司好似無統領委會

梁振英強調成立委員會係因為部分問題嘅爭議比較大，應該由唔同持扮者、唔同意見人士去商量同建立共識咁話。雖然話平均每局都係一個，但Emily覺得呢個說法唔係咁公平喇，因為好似標準工時專責委員會、單肢傷殘人士申領傷殘津貼跨部門工作小組等，都係由勞工及福利局負責，而律政司咁，就應該無統領任何委員會喎。


台前財長入委會 嚇親台媒

政府陸續公布委員會名單，好似上星期公布嘅經濟發展委員會中，其實都有唔少猛人，好似台灣前財政部長劉憶如亦榜上有名。雖然本地傳媒未有太多篇幅提到佢，但台灣傳媒就好關注，名單公布後，台灣媒體形容「驚見」、「赫見」劉憶如出任經發會成員，可想而知對台灣嚟講都幾震撼。


由於劉憶如都係台灣前高官，去年5月先辭職，咁快去香港出任公職都受到當地傳媒質疑，搞到佢要急急澄清，話呢個唔係官位，只係諮詢性質，「沒薪水、沒辦公室，實在不能說是個工作」咁話。