蘇錦樑嫌旅客太多？

【明報專訊】香港靠旅遊撐住經濟，仲係有名嘅旅遊城市，點知主理旅遊業務嘅商務及經濟發展局長蘇錦樑（Greg So）噚日話，香港旅遊設施唔係無限，要研究吓承受力。咁係咪即係限制旅客人數呢？佢話唔排除任何措施，真係聽到人一頭霧水，旅遊業界都話有簽證就可以嚟啦，唔畀人嚟會唔會影響旅遊形象呀？查實保安局長黎棟國早兩日講到明唔應該一刀切取消一簽多行，旅遊業界都唔明白Greg So要研究啲乜。


話說Greg So噚日喺電台度話，舊年香港旅客突破4800萬人次，但香港旅遊設施唔係無限，家陣要睇吓香港可以承受幾多旅客，長遠就要尋求高消費旅客，經濟發展委員會轄下嘅會展及旅遊業工作小組會研究。之後有記者追問佢係咪要限旅客，點知佢話唔排除任何措施。


話六大產業無被廢武功

咁六大產業又要再研究，係咪畀人廢武功呢？Greg So又話完全唔會，只係醫療同教育方面，要因應香港市民需求，再考慮係咪發展為產業，唔係推翻以前嘅工作。