夾band歡迎嚟天橋底

【明報專訊】由發展局起動九龍東辦事處負責籌劃嘅「反轉天橋底一號場」，噚日正式開放畀公眾，原來以往只會用嚟做臨時地盤辦公室或儲存物資嘅天橋底，可以用嚟夾band同開音樂會，Emily估唔到政府都幾有創意。


政府希望「反轉天橋底一號場」可以作為一個非正式嘅文化同表演場地，畀唔同團體喺度舉辦音樂會同展覽。場地採開放式設計，鼓勵市民得閒去坐去玩，而佢哋嘅基本設施亦好齊備，舞台、後台室、燈光同洗手間等一應俱全，搞band show都唔成問題。


發展局噚日特登邀請到敲擊樂隊「四擊頭」同青年協會嘅成員為場地揭幕，「四擊頭」仲以棄置油桶改裝而成嘅樂器演奏。呢啲充滿觀塘工業區特色嘅油桶，全部經過香港仔街坊福利會嘅藝術家修飾，亦會成為場地路邊嘅防撞裝置。「一號場」位於觀塘海濱道126號，係政府起動九龍東辦事處「反轉天橋底」嘅首個項目。


（盧翊銘攝）