靳埭強金蛇出洞

【明報專訊】蛇年就快到，各式賀年紀念品陸續出場，當然唔少得連續40幾年都有出嘅生肖紀念郵票。今年香港郵政搵咗已經14年無推出過生肖郵票、人稱「靳叔」嘅靳埭強設計郵票。


14年後首推出設計

1970年入行，當時只有3年經驗嘅靳埭強，嗰時獲郵政署邀請設計1971年農曆新年嘅豬年生肖郵票，成為首名獲邀華人設計師。但係佢話當時離六七暴動只係3年，港英政府對所有中國概念嘅嘢都有「政治恐懼」，所以要禁絕一切有「中國特色」嘅設計，例如紅色同太陽等。


靳叔話，1970年由英國人設計嘅狗年郵票，用咗一隻「黃皮狗」嘅實照，畀本地華人怒批係種族歧視，所以佢設計豬年郵票時，要小心唔好用錯白皮豬。最後走遍新界，搵到啱心水嘅「黑白皮豬」。


報章黑白印刷 鼠年郵票唔吉利

至於佢設計1972年嘅鼠年郵票，由於用實物寫照嘅老鼠難有美感，於是佢就設計兩款非常「摩登」、類似圓點圖案嘅老鼠。完成草圖時，佢同時任嘅郵政司都非常喜歡；但發表之後，由於當年報章以黑白印刷，令巿民以為佢設計兩個黑白圖點咁唔吉利，將當年嘅所有天災推去佢身上，郵政署此後3年都唔敢再搵佢設計生肖郵票。


已經14年無設計出生肖郵票嘅靳叔，今年用4種唔同中國傳統技藝，設計一套4款生肖郵票，仲有世界首款22K鍍金小型張。所有蛇年產品將會喺26號喺各大郵局有得賣。