劉華現立會長毛詩贈興

【明報專訊】民建聯劉江華獲委任為政制及內地事務局副局長，引起唔少爭議，噚日佢首次以副局長身分重返立法會出席政制事務委員會，民主派當然唔放過佢啦，劉江華身分唔同咗，噚日喺會上唔再同議員針鋒相對，強調會同各黨派溝通咁話。


政制事務委員會討論《施政報告》，社民連梁國雄就改咗宋朝詩人王安石嘅詩賀劉江華，話劉「保皇牆頭草，敗部竟復生，遙知都是糞，唯有腐臭臨」，大鬧政府委任喺立法會選舉輸咗嘅劉江華，要求局長譚志源解釋呢個決定。


委員會主席譚耀宗可能唔忍心黨友畀人糟質，所以多次話問題同施政報告無關，譚志源亦無回應點解要請劉江華。


卿姐藉截聽條例暗窒

民主黨劉慧卿就問，劉江華究竟喺政改上扮演咩角色，又話佢過去同部分黨派「有好大牙齒印」，叫佢去做，只會事倍功半，仲要求劉江華開金口回應，會唔會喺立法會表明「一寸都唔畀過」，明顯暗示當日傾截聽條例時佢嘅態度有問題。


劉江華多謝卿姐提點，佢話會繼續同各黨派溝通。譚志源會後話劉江華表現幾好，至於政改方案，呢項工作「全世界都要落水」，全民皆兵喎。