海洋公園年宵辦極速約會

【明報專訊】海洋公園喺農曆新年期間，除咗舉行賀歲活動同遊人喜氣洋洋迎蛇年，更會炮製情人節特備活動，仲首次同「極速約會」（speed dating）公司合作，喺年宵佳節（2月24日）免費邀請50對單身男女赴會。佢哋要喺高空行駛嘅纜車中互相結識，返回地面再玩遊戲，睇吓會唔會擦出火花。


教你浪漫影相位 潛水員幫手示愛

年初五適逢情人節，公園除推出情人節套餐，仲另設1688元套票，當有情人喺海龍王餐廳享受晚餐嘅時候，潛水員會喺「海洋奇觀」水族館內手持愛的宣言，畀遊人向另一半示愛。公園並推介浪漫拍拖影相位，包括摩天輪、纜車廂內、嵐灣餐廳及懷舊電車等。


馬會則喺年初三於沙田舉行蛇年首個賽馬日，入場人士可獲贈「奔馬襟針」同抽獎卡，襟針上嘅駿馬形態取材自徐悲鴻《奔馬圖》；抽獎卡即揭有機會贏取「足金元寶擺件」或「足金生肖吊墜」。初三嘅三T，若10元一注獨中正獎，估計彩金高達2000萬。六合彩新春金多寶初五舉行，10元一注獨中頭獎，獎金可高達半億。