龐愛蘭葛珮帆無偈傾

【明報專訊】上年9月舉行立法會選舉，新界東除民主派混戰，建制亦都出現大混戰局面，被指係「西環契女」公民力量龐愛蘭以幾千票之差落敗，而民建聯葛珮帆就高票當選，搞到兩個團體裂痕好深，至今仍未修復。有地區人士話，早前烏溪沙村搞個盤菜宴，兩女同場但都無交流，據聞即將舉行區議會補選，公民力量更加謝絕民建聯協助咁話。

沙田補選講明唔使民建聯幫

民建聯劉華出任副局長後，佢沙田區議會席位懸空，除民主黨丁士元，前年讓路畀劉江華公民力量潘國山噚日都報名參選。話晒劉華都係中途辭職，相信點都對潘國山勝算有影響，但有新東地區人士話，因為舊年選舉時恩怨，公民力量已經講到明，唔需要民建聯幫忙。

盆菜宴雙方面左左

有地區人士透露，其實公民力量同葛珮帆甚至民建聯其他沙田成員關係都幾惡劣，剛過去星期日烏溪沙村舉行盆菜宴，請公民力量何厚祥、龐愛蘭同多名新東地區人士出席，據講何厚祥一見遲葛珮帆現身，就立即話有事要早走；至於葛珮帆同龐愛蘭兩位女士，即使同食飯亦全程無交流。