卿姐：保皇黨阻撓

【明報專訊】近排有唔少建制派人士都表示應該幫民主派攞回鄉證返內地，民主黨主席劉慧卿噚日同Emily及一班行家茶敘，佢話有可靠消息透露，有啲保皇黨反對佢哋攞番回鄉證，理由係「你返唔到，幫唔到啲選民」，不過就唔肯透露邊啲保皇黨阻撓佢攞證。


老董曾籲「講少啲嘢」

卿姐話，無收到攞到回鄉證嘅信息，佢記起7至8年前，喺日內瓦聯合國會議上，遇到時任中國常駐聯合國日內瓦辦事處大使沙祖康，問佢點解返唔到內地，沙祖康當時話「如果你啲表現好啲，就可以回鄉」，連董伯伯在任嗰時都叫佢講少啲嘢。


不過，卿姐話，想唔想返內地都係其次，因為返去係佢嘅權利，質疑內地「怕我啲乜？當我係拉登定薩達姆？」。


雖然卿姐曾經跟過立法會返內地幾次，但係佢講到明，除非佢有朝一日可以自由進出內地，否則「有我喺立法會一日，永遠唔會有全體（議員）返內地，唔使施捨」。