梁太送「驚喜」

【明報專訊】特首夫人梁唐青儀同天主教香港教區前主教陳日君樞機，噚日出席籌款活動「愛心聖誕大行動2012」閉幕午宴，活動籌得超過1800萬蚊，幫到18個慈善機構推展服務。當梁太準備公布最終籌款金額，將「5」字放上金額欄嗰陣，發現數字錯咗，當時佢個樣仲表現得好驚奇咁，而主持人都話數字「唔啱」。但係當梁太揭開「5」字時，啲人發現後面係一個「8」字，原來梁太想畀大家一個「驚喜」。


同陳日君密斟

梁太同陳日君樞機喺宴會上密斟，不過離去時就唔肯評論《施政報告》。樞機同Emily講，原來之前未見過梁太，佢哋只係傾可以點樣將籌款愛心傳落去。樞機話家忙住教書，不問政事，又引用今年教宗本篤十六世元旦文告，話希望有叻人可以諗到一個新嘅金融制度，大家都可以發達，唔使隔一段時間就有金融災禍，又唔希望有人因為咁而被淘汰。