蔣麗芸休戰唔嗌交

【明報專訊】民建聯蔣麗芸（Ann姐）前日喺立法會同長毛梁國雄嗌大交，一個叫對方「收聲」，另一個還擊「你傻㗎」。激戰過後，Ann姐話願意「休戰」，以後盡量忍住，就算長毛喺立法會發言離題激嬲佢，都只會向主席投訴要求處理，避免當面同長毛對罵，費事大家面左左。不過，Ann休戰嘅理由都有少少撩交嗌成分，佢話「梁國雄生活咁苦澀、咁酸溜溜，我同情佢，唔同佢鬧交！」


認為中產應有車有樓

Ann姐自我感覺良好，仲話前日鬧完長毛後，長毛出席另一會議即時收斂變乖，好正經咁問問題！

Ann姐成日暴跳如雷咁講嘢，但好彩身體尚好，入立法會前做體驗，無高血壓或心臟病，所以唔怕鬧交，但佢話近日睇到篇文章，講到香港政界有唔少女士都曾患癌，文章話可能同壓力大有關，所以佢都要留意一下！

噚日立法會，黨友葛珮帆動議辯論政府扶助中產嘅議案，Ann姐都有偉論，佢話中產應該係有車有樓，得閒可以去吓旅遊，最好外地有間度假屋，但係香港嘅中產，多數都係1萬至1.9萬蚊月薪一族，幾難過到中產階級嘅生活水平。