跳出新東 新同盟開拓北區

【明報專訊】新民主同盟范國威（Gary）當選新界東立法會議員，都要跳出佢扎根嘅將軍澳，喺沙田大圍同埋粉嶺華明邨嘅新辦事處即將啟用。新同盟一班後生仔區議員亦跳出佢哋嘅原來選區，靜靜去到北區嘅上水、粉嶺。北區原本係民主黨黃成智嘅地頭，但成智選舉落敗，新同盟話北區泛民勢弱，希望可以開拓地盤。


年輕成員輪流做召集人

新同盟只有30名成員，唔會行「大佬制」，採輪流當召集人制度，其中最「嫩口」、只得24歲嘅召集人鍾錦麟話，希望新同盟唔止喺新東區服務，家有幾個新西地區人士都傾緊加入。佢哋亦計劃搞實習生制度，喺大學招攬學生，希望培養新血加入。


新同盟嘅大埔區議員關永業就話，以前佢幫鄭家富工作時，都有處理北區事務，但其後北區分咗畀黃成智處理，家成智落選，而范國威亦會喺粉嶺開議員辦，所以佢都重返北區，但話建制派喺北區勢力龐大，要開拓北區工作唔容易。


政府剛提出每個區議會撥出1億元搞重點工程，但關永業話政府要求各區喺3月底前提交工程項目，擔心會變成大白象，或者係龍尾灘翻版，要求延長提交方案嘅時間，等佢哋諮詢民意。