郵輪唔泊新碼頭 來港倒數

【明報專訊】香港嘅煙花匯演吸引唔少遊客，連走高檔路線嘅水晶郵輪，都為咗睇今年除夕煙花倒數，專登改行程留喺香港倒數迎接2014年，但係新嘅啟德郵輪碼頭未必睇到煙花靚景，所以最終會停泊海運碼頭。


旅發局搞嘅郵輪論壇噚日結束，唔少郵輪公司睇咗已經起得七七八八嘅啟德郵輪碼頭，信心都大咗。


今次成50個各地郵輪及碼頭高層聚首，協助統籌論壇嘅Seatrade主席Christopher Hayman話，大家傾咗唔少新搞作，例如諗住香港開去台灣、再去沖繩嘅郵輪團。Emily聽落都覺得幾好玩，但係要去成6日，要有長假期至去到。


旅發局總幹事劉鎮漢話，論壇反應幾好，超乎佢預期，除咗水晶郵輪停喺香港睇倒數煙花，唔少公司有意吸泛珠三角同港客，但就要諗點樣迎合內地口味。