新聞類別
財經
詳情#
【明報專訊】國泰航空（0293）早排陷入勞資糾紛，但即將開業嘅國泰空運貨站，就因為請唔夠人，要大打「親善牌」，話每年所有員工都可以以一折嘅「跳樓價」，獲得24張機票，所有航線任搭！家香港有最低工資，去國泰貨運站做，又要去到赤鱲角，山長水遠，唔怪得請唔到人啦。
入機場工作 薪金未算吸引
新空運貨站將會喺下個月21日開業，國泰所有貨都會轉去呢個新貨站處理。新公司嘅行政總裁丘應樺話，新貨運站全面投入運作，將可以創造超過1800個職位，但機場離市區遠，好多市民對「機場打工」冇興趣。「為補償路途遙遠，我哋提供可觀嘅收入，所有員工每月可以攞到手嘅錢，不會少於1萬元。」
除咗人工之外，更加吸引嘅，係向員工大派機票。丘應樺話，只要員工喺公司做滿1年，就可以每年用一折嘅價錢，獲得24張機票，即係飛12程。但條件係航班有空位先得，員工嘅配偶同子女（未滿24歲），都可以享受呢項福利。不過，小琴心諗，家做洗碗都萬幾元一個月，1萬元人工實在唔算吸引，咁就真係要搵嗰D好鍾意周圍飛嘅人來做先得。
國泰貨運站投資59億元，2月底先投入第一階段服務，今年內可以全面運作，預計每年處貨量可達260萬噸，令香港機場總處貨量升至740萬噸。丘應樺話呢個國泰貨運站比現有嘅兩個貨運站遲出世，自然要更加先進。
由於引入好多自動化處貨技術，令貨物轉機接駁嘅時間，可由市場當前平均8個鐘，減少至3個鐘。
email: [email protected]
留言 (0)
