香港上網全球最快

【明報專訊】香港人成日嫌上網唔夠快，不過根據一項全球調查，香港原來係全世界上網最快嘅地方，最高網速超過54MB/S，美國就名列14，最高網速只係29.6MB/S。


呢個由國際網絡公司Akamai Technologies做嘅調查顯示，香港嘅最高網速名列前茅，韓國就以48.8MB/S緊隨其後，第三係日本嘅42.2MB/S。不過喺穩定方面，香港輸畀韓日排第三，韓國嘅平均網速係14.2MB/S，日本10.7MB/S，香港8.9MB/S。


三成網絡攻擊來自內地

資訊科技商會會長方保僑對結果都有啲驚奇，佢話根據實際經驗，美國、歐洲嘅大城市普遍上網比香港慢，但佢就唔覺得香港上網超快。佢仲話香港人口密集，上網隨時要同大廈幾百戶爭，所以網速都好視乎地區同時段。而內地喺其中一項統計都贏晒全世界，有33%嘅網絡攻擊都係嚟自內地，為全球之冠。