傳秘戀3年朴敘俊棒球衫暗藏朴敏英生日

【蘋果日報】主演人氣韓劇《金秘書為何那樣》嘅「雙朴」朴敘俊、朴敏英，日前突然被爆透過Instagram傳情，早於合作tvN人氣劇《金秘書為何那樣》前已秘戀3年，令粉絲相當震驚。不過雙朴火速否認戀情，表示只係親近嘅前後輩關係，不過外界普遍都持懷疑態度。
有網民翻摷雙朴拍拖證據時，意外發現朴敘俊棒球衫嘅號碼，都同緋聞女友有關。朴敘俊於2013年與女星白珍熙合作《鑽石人生》後兩度傳出緋聞，雖然朴敘俊例牌否認拍拖，不過熱愛棒球嘅佢，就被發現當時嘅球衣號碼係「28」，有網民認為係意指白珍熙2月8號嘅生日。但朴敘俊於2016年加入藝人棒球隊「Playboys」時，球衣號碼卻改為「34」，而朴敏英嘅生日正正係3月4號，唔通真係巧合？