張良：好彩唔做教局

【明報專訊】運輸及房屋局長張炳良噚日出席青協活動與年輕人對話，張良未做局長前係教院校長，有傳佢本來係做教育局長，佢好坦白咁講，本來想做教育局長，不過太太家發覺「塞翁失馬，焉知非福」，仲講笑咁話「好彩唔做教育，唔係就要處理國教事件」。


「否則要處理國教」

張良又話，佢做咗房委會委員好耐，本來以為改組後嘅房屋規劃地政局挑戰都大，獲邀入政府，諗住做住運房局先，點知政府改組唔成，家六成工作時間用咗喺運輸，因為政策涵蓋海陸空，好彩太太點都支持佢喎。


碩士生訴苦：認識劏房勝陳茂波

有年輕女碩士生Flora噚日向張良訴苦，佢話自己做緊嘢，但因為家暴要搬出嚟住，足足去咗五六個區，搵成30間劏房，由80呎無窗4000蚊月租，到100呎9000蚊月租都有，Flora笑言自己「對劏房認識應該比（捲入劏房風波嘅發展局長）陳茂波多」，最終佢搵咗間商住單位。Flora話「劏房係偉大市場發明」，希望局長關注情况。張良強調會取締不符結構安全嘅劏房，又會提供市民負擔得起嘅上車盤。