卿姐手指指殺食 黨橫額讓路

【明報專訊】民主黨內部早前以黨主席劉慧卿「手指指」嘅大頭相，製作咗一張海報貼喺總部，提醒同事離開前記得熄燈。據聞呢張海報一出，人人即刻聽聽話話，唔敢違令，而呢張相本身亦極有潛力成為「萬能key」，事關民主黨噚日就用呢個嘜頭，整咗幅橫額參與民陣發起嘅倒梁遊行，相信卿姐個霸氣樣都震懾到唔少途人。


嘜頭key上橫額

民主黨放低平時用開嘅典型綠色橫額，改用呢幅卿姐橫額，話「政制、退保不能再拖」，仲配上卿姐名句「梁振英你好離譜囉」，真係一絕，難怪有人笑稱呢幅係遊行中「最有震懾力同壓迫力嘅橫額」。


民陣噚日發起嘅遊行改喺銅鑼灣東角道出發，而唔係平時嘅維園，參與人數較預期少，反而出發隊伍後方就出現咗一條好長嘅人龍，十分熱鬧，原來人龍唔係等出發，而係排隊去利苑粥麵食嘢，因為利苑抵抗唔到加租而即將結業，唔少人都趁最後機會去捧場。