CY基層雲端會面

【明報專訊】過去幾日，Emily同一眾行家要搵特首梁振英回應劉夢熊的指控，CY一係就唔答，一係只係向指定嘅傳媒答，一眾行家到噚日先至係雲端有機會直接問CY。國泰噚日搞咗個基層家庭免費搭飛機嘅活動，梁振英都有出席，同82個單親家庭一齊搭飛機遊香港上空，但係佢就無回應有關夢熊嘅指控。


活動中，CY坐商務艙，單親家庭就坐經濟艙，但一班未搭過飛機嘅小朋友，都話好開心可以同特首同機，部分家長就把握機會反映訴求。


喺90分鐘航程中，航班起飛咗30分鐘，飛機餐都推晒出嚟，直到食雪糕嗰陣，CY終於揸住杯雪糕行出嚟，同大家揮吓手。點知一揮手，小朋友就遞上玩具護照，要求特首簽名，CY單手都照簽，仲話明「一個家庭只可以簽一個」。


收學位訴求 CY祝好運

第一次搭飛機，5歲嘅朱雅媛就唔理CY咁多，專心欣賞窗外嘅風景，「好開心，見到啲雲好似棉花糖咁」，話希望日日返學都搭飛機，朱媽媽就笑住話，希望將來有機會再帶雅媛搭飛機，去美國迪士尼玩。


每月依靠8000蚊綜援金、住喺公屋嘅周女士就把握機會，為身旁讀中六嘅女兒，向CY反映學位少嘅問題。不過，周女士無奈咁話，CY「只係話祝我哋好運，都算係答咗嘅」。