「香港二號」生龜仔失敗

【明報專訊】5年前曾到南丫島深灣產卵嘅綠海龜「香港二號」，舊年夏天再嚟生咗5窩550隻蛋，為咗增加幼龜存活率，漁護署執起所有龜蛋人工孵化，可惜啲蛋無受精，未能孵化。


綠海龜係極度瀕危動物，南丫島深灣係全港唯一有綠海龜上岸產卵嘅地方，漁護署每年夏季封灘，又幫上岸生蛋嘅綠海龜安裝追蹤器，了解佢哋離港後去向。「香港二號」03年同08年喺深灣產卵後游返越南，舊年返嚟，可惜未能傳宗接代，或者係途中搵唔到雄龜交配啩。


「香港二號」至少嚟過香港3次，但「香港一號」只於02年到深灣產卵，之後未有返嚟。另外，漁護署上年12月14日接到報告，一隻綠海龜喺大埔對開被困魚網，救起後送到海洋公園，漁護署噚日喺香港東面水域將佢放生。