公民黨拍《陽光時務》年宵散貨

【明報專訊】仲有個零禮拜就係農曆新年，各政黨已經密鑼緊鼓籌備今年嘅年宵產品，公民黨今年就搞搞新意思，同近期熱爆全城嘅《陽光時務週刊》crossover，務求盡力去晒啲貨咁話。


買拖鞋送過期周刊

今日將正式介紹一系列年宵產品嘅公民黨，透露今年獲得《陽光時務週刊》贊助，市民買一對「人人落力踩CY」膠拖鞋，就可免費獲贈過去期數嘅《陽光時務週刊》一本。


公民黨早前已經為呢款拖鞋宣傳，仲以優惠價鼓動市民提早入貨，家又再出招谷貨，莫非擔心市民因為唔好意頭，唔想喺新年買「鞋鞋聲」嘅嘢？

另一邊廂，《陽光時務週刊》喺刊出轟動全城嘅劉夢熊專訪之前，知名度只係一般，銷量唔算特別高。今次同公民黨合作，既可增加讀者群，又可以去晒積存舊貨，算係一舉兩得，互惠互利。