哈佛港大醫學院合作

【明報專訊】港大醫學院噚日有大批香港及美國醫學巨頭現身，難道有大型疾病事故？Emily八卦下發現，原來係美國哈佛大學公共衛生學院院長Julio Frenk帶埋其他教授來港，同港大李嘉誠醫學院簽訂合作備忘，加強推動公共衛生交流。Frenk教授仲話，希望可以建立到一個兩間院校嘅學習平台，畀研究員同學生喺網上虛擬課室同聊天室交流一下最新嘅疾病資訊。


活動係哈佛醫學院訪華嘅第三站，首兩站係北京同上海。噚日活動中有70名嘉賓，除咗食衛局長高永文同副局長陳肇始有現身外，醫管局主席胡定旭同行政總裁梁栢賢都喺度。


代表港大醫學院嘅院長李心平話，原來兩校2001年已開始合作，由當時港大教授梁卓偉發起。Emily心諗，唔知今次再合作，係咪同梁做完官返番港大教書有關呢？